Manifestación: Stop redadas, detenciones y deportaciones


Va unes selmanes, la Brigada d’Estranxería de la policía nacional detuvo a un vecín d’Uviéu, migrante senegalés, na so propia casa. El motivu: que la orde del Ministeriu del Interior yera salir a la caza de persones de nacionalidá senegalesa y maliense pa enllenar un avión de deportación programáu pa pocos díes dempués con destín a Dakar y Bamako. Otra persona de nacionalidá senegalesa, residente n’Avilés, foi citada na Oficina d’Estranxería con un pretestu burocráticu; la intención verdadera yera prindalu y deportalu nesi avión.

Unos 140 aviones de deportación marchen tolos años con miles de persones. Munches d’elles lleven viviendo equí años y inclusu décades, son les nuestres vecines y vecinos. Interceptaes por mediu de redaes racistes, llevenles a los calabozos de la comisaría, onde pueden permanecer hasta tres díes sufriendo, davezu, tratos vexatorios y humillantes. Darréu, pueden ser deportaes directamente o bien conducíes a un Centru d’Internamientu d’Estranxeros (CIE), nel que se les retién hasta 60 díes. Pa internales, requierse la connivencia de xueces que dicten los ingresos nos CIE.

N’Asturies, la llegada de población migrante nos últimos años foi bien escasa. El númberu d’inmigrantes nun algama nin tan siquiera les cincuenta mil persones, menos del 5% de la población. Sicasí, la Brigada d’Estranxería detién y encierra, de media, a una persona al día por nun tener permisu de residencia.

Los operativos policiales de deportación carauterícense por una violencia desmedía: nos aviones viaxa’l doble de policíes que d’inmigrantes; esiste toa una serie d’instrumentos represivos autorizaos; los desnudos integrales, les palices y les inyeiciones con sedantes formen parte de les práutiques policiales.

Mentantu, dos empreses, Air Europa y Swift Air, reciben decenes de millones d’euros por fletar los vuelos de deportación. Nestos momentos, hai un concursu públicu nuevu pa contratar vuelos de deportación. Les empreses Barceló y Air Nostrum sumáronse a la puya pa llevar esti negociu puercu.

La Ruta contra’l racismu y la represión fai un llamamientu a:

• Manifestase peles casi d’Uviéu el sábadu 23 d’abril a les 12h, con salida dende la estación de la Renfe, pa denunciar l’hostigamientu a les nuestres vecines y vecinos.

• Texer redes de sofitu mutuu ente la población autóctona y la migrante, refugando los discursos manipuladores que traten de rellacionar crisis con inmigración.

• Señalar a Gabino de Lorenzo, Delegáu de Gobiernu, como responsable políticu n’Asturies de les redaes y detenciones racistes.

• Boicotiar a les empreses Air Europa y Swift Air, y a tol grupu Globalia (Halcón Viajes, Viajes Ecuador, Travelplan, Pepephone, Belive…), por llucrase col negociu puercu de les deportaciones.

• Boicotiar tamién a Barceló y Air Nostrum por presentase a esti concursu oscenu.

Mientres la maquinaria deportadora española furrula a diaríu contra los migrantes de munches procedencies, la llegada de refuxaes pela frontera griega de la UE ta provocando un endurecimientu brutal de la política migratoria europea, concretáu nel acuerdu UE-Turquía pa les deportaciones coleutives. Una vegada más, Europa abuel el derechu d’asilu en cuantu’l mesmu podía protexer a abondos migrantes. Dichu derechu sólu foi aplicáu históricamente pola UE pa “protexer” a minoríes pequeñes y presentar Europa como garante de los Derechos Humanos. Sólu la conexón de delles lluches va poder dar llugar a una verdadera llibertá de movimientu.

La llucha contra les fronteres ye hermana de la llucha pola soberanía alimentaria, l’autonomía enerxética, la soberanía política de los pueblos, el fin de la violencia patriarcal… El derechu a permanecer nel propiu territoriu en condiciones dignes -el derechu a nun tener qu’afuxir- y la llibertá de cruciar fronterer pa buscase la vida forma parte d’una mesma llucha.

Fuente: Tercera Información